Mediaverklarings vir 2020

2020-10-01: DBO se “onsekerheid” oor leerders kommerwekkend

Minister Motshekga het vanoggend die jongste maatreëls vir skole tydens ʼn nuuskonferensie bekend gemaak. Die DBO se “onsekerheid” oor leerders wat hulself nog in landelike gebiede bevind en nog nie teruggekeer het skool toe nie, is kommerwekkend. Dit terwyl leerders veronderstel is om reeds vier maande lank al terug te wees by die skool, al is dit op roterende basis.

2020-09-24: SOS vier Erfenisdag met suksesvolle virtuele kongres

Die keuse van Groei as tema vir die SOS se eerste virtuele kongres,e groei wat vanjaar op alle terreine by skole ervaar is. Die kongres was aan die voorpunt van tegnologie met 21 sprekers, 20 unieke wegbreeksessies en boonop ʼn Braaidagboodskap van Jan Braai - alles aanlyn!

2020-08-25: Minister Zulu moet bedank

Daar is egter steeds talle kleuterskole wat nog nie kon heropen nie. Gebrek aan noodsaaklike befondsing, gebrek aan persoonlike beskermende toerusting en intimidasie deur die Departement van Maatskaplike Ontwikkeling (DSD) se amptenare kniehalter pogings om broodnodige sorg aan kleuters te voorsien.

2020-07-30: Agt planne om steeds die skooljaar te red

Ten spyte van hewige teenkanting en grondige bewyse dat dit nie in die beste belang van skole en leerders is nie, het pres Ramaphosa op 23 Julie aangekondig dat openbare skole vanaf 27 Julie tot 24 Augustus 2020 weer sluit. Die SOS ondersteun steeds die verantwoordelike en veilige voortsetting van onderwys en het verder planne bekendgemaak om te verseker dat leerders die akademiese jaar sinvol voltooi.

2020-07-23: Onderwys verder geknou met skole wat weer sluit

Die Solidariteit Skoleondersteuningsentrum (SOS) ondersteun steeds die verantwoordelike en veilige voortsetting van onderwys. Baie skole en onderwysers het sedert die begin van die inperkings skouer aan die wiel gesit en het die onbekende uitdagings met groot sukses te bowe gekom.  Dit is egter nie die geval in alle skole en vir alle onderwysers nie.

2020-07-17: “Daar moet volledig met die reg op lewe gehandel word.”

Die hernude debat rondom die sluiting van skole te midde van die Covid-19 pandemie, het hierdie week die hoofopskrifte van media landswyd gehaal. Verskeie onderwysvakbonde eis dat skole moet sluit en eers weer heropen wanneer die piek van die pandemie verby is.

2020-07-09: Onderwys gaan oor meer as klasgee

Die SOS ondersteun die verantwoordelike en veilige oopmaak van skole. Die SOS sê deurgaans dat skole se bestuur en skoolbeheerliggame hul unieke omstandighede die beste ken en kan besluit hoe hulle die situasie hanteer.

2020-07-09: Skrywe aan Departement rakende minagting van hofuitspraak

Die Solidariteit Skoleondersteuningsentrum (SOS) se regspan het ʼn dringende skrywe aan die Departement van Maatskaplike Ontwikkeling gerig om die situasie rondom die heropening van kleuterskole uiteen te sit.

2020-07-06: Kleuterskole en VKO-sentrums mag dadelik heropen

Die Solidariteit Skoleondersteuningsentrum (SOS) en Solidariteit se Beroepsgilde vir Maatskaplike werkers het vanoggend hulle saak oor die heropening van kleuterskole in die Hooggeregshof in Pretoria gewen.

2020-07-01: Kleuterskole weet steeds nie wat hul lot is nie

Die dringende hofaansoek deur die Solidariteit Skoleondersteuningsentrum (SOS) en Solidariteit se Beroepsgilde vir Maatskaplike werkers om regsekerheid te verkry oor die heropening van privaat kleuterskole en dagsorgsentrums, is verder vertraag.

2020-06-11: Spesiale beroepsgilde vir Beheerliggaamonderwysers

Solidariteit, in samewerking met die Solidariteit Skoleondersteuningsentrum (SOS), het aangekondig dat hulle ‘n spesiale beroepsgilde vir beheerliggaamonderwysers stig. Skole landswyd sukkel om skoolgelde in te vorder sedert inperkings in Maart ingestel is.

2020-06-08: Dringende hofaansoek om VKO-sentrums te heropen

ʼn Dringende hofaansoek deur die Skoleondersteuningsentrum (SOS) en Solidariteit se Beroepsgilde vir Maatskaplike werkers om regsekerheid te verkry oor die heropening van privaat kleuterskole en dagsorgsentrums, is vandag in die hooggeregshof gebring. Die minister van Maatskaplike Ontwikkeling, Lindiwe Zulu, het tot dusver nog geen aanduiding gegee wanneer hierdie vroeë-kinderjare-ontwikkelingsentrums (VKO-sentrums) kan heropen nie.

2020-06-02: Hofaksie dreig indien skole nié oop kan maak

Solidariteit en die Skoleondersteuningsentrum (SOS) verwelkom die wysigings op die aanvanklike direktief vir heropening van skole wat laat gisteraand in die staatskoerant gepubliseer is. Die direktief bevestig dat skole op 1 Junie kan heropen.

2020-06-01: Minister kan nie regeer deur verklarings nie

Solidariteit se Skoleondersteuningsentrum (SOS) bevestig dat skole wat voldoen aan al die voorgeskrewe maatreëls soos gepubliseer in die Staatskoerant Nr. 43372 op 29 Mei, kan heropen vir personeel en leerders. Die Regulasies soos afgekondig in die Staatskoerant geld, en kan nie na willekeur deur die minister met media-uitsprake gewysig word nie. Solidariteit het dringend ʼn regsmening bekom om skole se reg te bevestig en aan ledeskole beskikbaar gestel.

2020-05-20: Skoolgaan is goed vir kinders

Die SOS verwelkom die feit dat minister Angie Motshekga bevestig het dat leerders regoor die land wel op 1 Junie moet begin terugkeer skool toe, maar dring aan op meer magte aan skole en provinsies om hul eie terugkeerplanne te maak. Volgens die minister se plan sal slegs Gr. 7 en Gr. 12-leerders op 1 Junie met kontakonderrig begin, terwyl ander grade mettertyd ingefaseer word.

2020-05-06: Innovering as hulpbron binne onsekerheid

Die voortdurende uitstel van die departement om maatreëls aan te kondig, laat leerders al verder agter raak met hul onderrig. Dié agterstand is veral ‘n realiteit vir leerders aan skole wat geen aanlyn opsies bied of ander planne maak om leerders by te staan om tuis te werk nie.

“Skole se belangrikste hulpbron is hul vermoë om innoverend op te tree. Gebruik die hulpbronne tot jou beskikking."

2020-05-01: Beheerliggame moet self oor skole se opening besluit

Die SOS verwerp die minister van Basiese onderwys, Angie Motshekga, se onverwagse en onverklaarbare uitstel van die begin van kontakonderwys. Dit dien nie die beste belang van leerders en onderwysers nie. Die demokraties verkose beheerliggame van skole moet die reg hê om saam met skoolbestuurspanne oor die opening van skole te besluit. Hulle ken hul skole se omstandighede en weet die beste wat in die belang van hul leerders en onderwyspersoneel is.

2020-04-15: SOS ondersteun reg tot skoolonderrig

Die ekonomiese impak van die Covid-19-inperking word ook in skole ervaar, waar sommige ouers reeds nie in staat is om skoolfonds te betaal nie. Dit beïnvloed skole se kontantvloei drasties en dit is veral onderwysers wat deur skole se beheerliggame aangestel is, wat eerste in die slag kan bly.

2020-03-16: Vyfpuntplan vir skole om by te bly tydens Korona

President Cyril Ramaphosa het Sondagaand tydens ’n regstreekse toespraak aangekondig dat Dinsdag, 17 Maart die laaste skooldag van die kwartaal sal wees en eers na Paasnaweek (14 April) sal heropen. ‘n Groot deel van hierdie tyd val gelukkig binne die skoolvakansie, maar effektief kan leerders 11 skooldae verloor. Dit is belangrik om tydens hierdie tyd kontinuïteit in onderrig te verseker.

2020-03-09: Graad 1’s moet juis teruggehou word...

Die Skoleondersteuningsentrum (SOS) verwelkom Panyaza Lesufi, LUR vir Onderwys in Gauteng, se onderneming dat “al die grade van Graad R tot 12 van nou af belangrik is”, maar voel dit dui op ‘n erkenning dat slegs Graad 12 in die verlede as belangrik beskou is. Die gejaag na goeie matriekmatriekuitslae oorskadu die probleme wat in die vroeë ontwikkelingfase ondervind word.

2020-03-03: SOS inspireer karakterbou van leerders tydens sportseminaar

Die Skoleondersteuningsentrum (SOS) het gister hulle nuwe Rassie Erasmus Sportvereniging in Centurion bekendgestel. Die vereniging hoop om by te dra tot die karakterontwikkeling van jong sportsterre, maar meer belangrik, die vestiging van wedersydse respek op die sportveld.

2020-02-19: Dryf dié uittog die onderwysstelsel tot rommelstatus?

‘n Uittog van ervare onderwysers dreig opnuut ná Cosatu se plan dat R250-miljard uit die Pensioenfonds vir Staatsamptenare (GEPF) geneem word om Eskom se skuld te help delg. Soos ander staatsamptenare, is onderwysers bekommerd dat hierdie plan sal veroorsaak dat daar oor ’n paar jaar niks van hul pensioen oor sal wees nie.

2020-02-05: SEA - Leerders moet ten alle tye eerste gestel word

Die Skoleondersteuningsentrum (SOS) ondersteun die Wes-Kaapse Onderwys Departement (WKOD) se beplande onafhanklike evaluasie-owerheid (SEA) vir skole. Die owerheid het ten doel om onderwysers wat deurlopend afwesig is, of onderwysers wie se werk nie op peil is nie, vas te vat.

2020-01-28: Gauteng se plasing-chaos duur voort

Die skooljaar is al byna drie weke aan die gang en steeds is plasings van Gauteng-leerders nog nie afgehandel nie. Skole se akademiese programme word ontwrig en leerders wat besig is met klasse word ontneem aan hulle basiese reg tot onderwys, terwyl ander tuis sit omdat hulle steeds nie plek in skole kry nie.

2020-01-21: Swak onderwys perk jongmense se geleenthede in

"Die toekoms van Suid-Afrika lê in sy jeug, maar die politici se fokus op slaagsyfers eerder as beter onderwystandaarde ontneem jongmense van ‘n billike kans om hul potensiaal te bereik. Gesonde leerkulture in topskole is van uiterse belang wanneer dit by matriekuitslae kom en word jaar op jaar hierdeur bevestig."

2020-01-15: Lesufi verantwoordelik vir chaos met plasings van leerders

"Die plasing van leerders in Gauteng se skole het vanjaar weens die sentralisering daarvan, in totale chaos ontaard. Terwyl mnr. Panyaza Lesufi, Gauteng se LUR vir onderwys, vol selfvertroue verwys na die 99,2% leerlinge wat in die provinsie geregistreer is, is daar steeds die 0,8% graad eens en graad agts wat nie kon uitsien na ‘n nuwe skooljaar of enige voorbereidings tref nie."

2020-01-14: Rus matrieks eerder toe vir die toekoms

"Die matriekuitvalkoers van leerders in graad 12 bied ernstige stof tot nadenke. Volgens die DBO se syfers het daar in Januarie 2019 altesame 616 754 voltydse leerders ingeskryf om die Nasionale Senior Sertifikaat-eksamen af te lê. Slegs 504 303 van die leerders het egter die eksamen in November geskryf."

Moenie toelaat dat huidige ekonomiese en politieke realiteite jou toekomshoop laat ontspoor nie.

Sluit vandag aan by die Skoleondersteuningsentrum.