Slaan eksamenkoors hok!

2021-08-23

Sarina Prinsloo

Skakelbeampte: SOS

Die rekordeksamen het aangebreek en matrikulante landwyd skuif agter hul boeke in om die laaste voorbereiding vir hulle matriekeindeksamen te doen. Skole begin vandeesweek met hulle rekordeksamen. Hierdie eksamen is veral belangrik omdat dit onderwysers die geleentheid gee om areas te bepaal waarmee leerders nog probleme ondervind om bykomende aandag daarop te vestig.

Baie leerders is bekommerd oor hul studies as gevolg van die afgelope 18 maande se uitdagings. Minder kontakonderrig het sy merk gelaat. Selfs by skole wat werklik moeite gedoen met aanlyn oplossings en ekstra klasse om verlore tyd in te haal. Toegang tot tegnologie plaas egter duisende hulpbronne, deur aanlyn platforms, binne die bereik van leerders.

Vir baie leerders is die rekordeksamen die eerste eksterne eksamen waar vraestelle nie noodwendig deur hulle eie onderwysers opgestel word nie. Die manier van vraagstelling kan hul omvergooi omdat hulle net gewoond is aan hul eie onderwysers se styl. 

Die langer lengte van vraestelle in die rekord- en eindeksamen vereis ook dat leerders eksamenfiks moet word. Dít is net moontlik deur oefening. Jana Terblanche, ʼn vakspesialis by die Solidariteit Skoleondersteuningsentrum (SOS), verduidelik dat dit belangrik is om vraagterminologie te bestudeer, bv. wat die verskil tussen illustreer en analiseer of verduidelik aan die hand van, ensovoorts, is. “Leer met ander woorde die woordeskat van vraestelle aan, dit sal jou baie tyd spaar as jy nie hoef te wonder wat van jou verwag word nie.”

Ouers, familie en onderwysers speel ook ʼn baie groot rol in leerders se eksamenfiksheid ten opsigte van selfvertroue en sukses. Daarom moet hulle ouers daarteen waak om matrikulante moedeloos te maak deur heeltyd te kontroleer of hul besig is om te leer. Ondersteun waar nodig en bly positief.

Die SOS bied ook ‘n voorbereidende eksamen om matrikulante op die Wiskunde-rekordeksamen voor te berei. Die eksamen bied aan leerders ‘n geleentheid om die kurrikulum te demonstreer, te bemeester en te konsentreer op afdelings wat nog steeds uitdagings veroorsaak. Leerders behoort na hierdie eksamen beter voorbereid te wees vir die eindeksamen. Die voorbereidende seksamen is beskikbaar op Die Wolkskool.

Laastens, aan elke matrikulant – onthou dat jou eie welstand en emosionele gesondheid eerste kom. Eet gesond, kry genoeg slaap, doen oefeninge (al is dit so eenvoudig as om elke dag te gaan stap). As jy moeg en emosioneel voel, vra vir hulp of gesels met iemand wat jy vertrou om jou deur die belangrike tydperk by te staan.

Gesels met ons

>